ನಾನು ಮನೆ ಬದಲಿಸಿದ್ದೇನೆ..!

ಇದು ನನ್ನ ಹೊಸ ಮನೆಯ ವಿಳಾಸ… ಬರಲು ಮರೆಯಬೇಡಿ…

http://www.hanihani.co.cc

ಹೀಗೊಂದು ಸಂಜೆ

ಅವಳೆದೆಯೊಳಗಡಿಯಿಡೊ ಘಳಿಗೆ…
ಬರ ಹೇಳಿಹೆ ತುಂತುರು ಮಳೆಗೆ..
ತೆರೆದಿರುವೆನು ಮುತ್ತಿನ ಮಳಿಗೆ..
ಬಂದರೆ ಕ್ಷಣ ಕ್ಷಣವೂ ರಸದೀವಳಿಗೆ…

ನೀ ತೋರದಿರೂ ಇಂದವಸರ…
ಮರೆಯಾಗದೆ ನಿಲ್ಲು ಓ ನೇಸರ…
ಬರಿ ಬಾನೆoದರೆ ಬಲು ಬೇಸರ..
ಮಳೆ ಬಿಲ್ಲಿಗೆ ಕೊಡು ತುಸು ಉಸಿರ…

ತಂಗಾಳಿಯೆ ಬೀಸು ನೀ ಮೆಲ್ಲ..
ಮುಂಗುರುಳ ನರ್ತನಕೆ ಬರಿ ಸೊಲ್ಲ..
ನಾಚಿ ಕೆಂಪಿಡುತಿರೆ ಸಖಿ ಗಲ್ಲ..
ಕದ್ದು ಮುತ್ತಿಡುವೆ ನಾ ಕಳ್ಳ…

ಹೆಸರಿಡದ ಹನಿಗಳು….!!

ಹಾಗೇ ಹೊಳೆದ ಕೆಲವು ಸಾಲುಗಳು… ಇವುಗಳಿಗೆ ಹೆಸರಿಡುವ ಸಾಹಸ ಮಾಡದೇ ಹಾಗೇ ಪೋಸ್ಟ್ ಮಾಡಿದ್ದೇನೆ… ಓದಿ ಏನನ್ನಿಸಿತು…?? ದಯವಿಟ್ಟು ಹೇಳಿ…

1.

ಅದೇನು ಆತುರ ನಿನಗೆ..??
ನಾನು ಕಣ್ಣು ಮಿಟುಕಿಸುವ ಮೊದಲೇ…
ನನ್ನ ಗಲ್ಲವ ಕಚ್ಛಾಯ್ತು…!!
ಅದೆಷ್ಟು ಗಾಢ ವರ್ಣ
ನಿನ್ನ ಲಿಪ್ ಸ್ಟಿಕ್ನದು..??
ನನಗರಿವಿಲ್ಲದೆಯೇ
ನಾಳಿನ ನ್ಯೂಸ್ ಪೇಪರ್
ಅಚ್ಛಾಯ್ತು…..!!

****************************
2.

ಮಂದಿರದ ಕೇಸರಿ ಪತಾಕೆ….
ಮಸೀದಿಯ ಹಸಿರು ಗೋಡೆ….
ಚರ್ಚಿನ ಬಿಳಿಯ ಬಾಗಿಲು….
ಸೂರ್ಯನುದಯಕ್ಕೆ ಕಾತರಿಸಿವೆ…
ಸೂರ್ಯನ ಬೆಳಕಲ್ಲಿ ಅವುಗಳ
ನೆರಳಿಗೆ ಒಂದೇ ಬಣ್ಣ…..!!

****************************
3.

ನವ ವಧುವಂತೆ
ಸಿಂಗರಿಸಿಕೊಂಡು
ಭೂ ತಾಯಿ
ಮೆರವಣಿಗೆ ಹೊರಟಿದ್ದಾಳೆ…
ಚೆಲುವಿಗೆ
ಮನಸೋತ ತಾರೆಗಳು
ಮೋಡದ ಮರೆಯಲ್ಲಿ ನಿಂತು
ಫೋಟೋ ಕ್ಲಿಕ್ಕಿಸುತ್ತಿವೆ…!!

ತಪ್ಪಿರುವ ಕಾಗುಣಿತ….!!!

ನಾನೆಂಬ ಭಾವನೆಯ ಮೇಲೆ
ಅಲ್ಪಪ್ರಾಣ…
ನೀನೆಂಬ ಮಾಯೆಯ ಮೇಲೆ
ಮಹಾಪ್ರಾಣ….
ಎಲ್ಲೋ ಉದ್ಘಾರ ವಾಚಕ,
ಇನ್ನೆಲ್ಲೋ ಪ್ರಶ್ನಾರ್ತಕ….
ಅಲ್ಲೆಲ್ಲೋ ಅಲ್ಪವಿರಾಮ,
ಮತ್ತೆಲ್ಲೋ ಪೂರ್ಣವಿರಾಮ…
ಹೃಸ್ವ, ಧೀರ್ಘ….,
ಕೊಂಬು, ತಲೆಗಟ್ಟು ಯಾವುದೂ
ಇರಬೇಕಾದಲ್ಲಿ ಇಲ್ಲ….
ಪ್ರತಿ ಸಾಲಿನಲ್ಲೂ ತಪ್ಪು ಹೆಜ್ಜೆಯಿಟ್ಟು
ತಡವರಿಸುತ್ತಿರುವ ಕಾಗುಣಿತ…
ಆದರೂ ನಿಶ್ಚಿಂತೆ….

ಏನೂ ಇಲ್ಲದಿದ್ದರೂ
ನೀನಿರುವೆಯೆಂಬ ಕಲ್ಪನೆಯೊಂದಿದೆ..
ಆ ಕಲ್ಪನೆಯಿಂದಲೇ
ನನ್ನ ಕವಿತೆಗಳಿಗೆ ಹೊಸ ಅರ್ಥ ಬಂದಿದೆ…

ಬೆಂಕಿ ಮತ್ತು ಹೊಗೆ

ಬೆಂಕಿಯಿಲ್ಲದೇ ಹೊಗೆಯಾಡುವದಿಲ್ಲ
ನೀನು ಹೃದಯಕ್ಕೆ ಬೆಂಕಿಯಿಟ್ಟೆ….
ಗಡoಗಿನ ಗೋಡೆಗೊರಗಿ,
ಕೊರಗಿ, ಸೊರಗಿ…
ನಾನು ಹೊಗೆಯ
ಸುರುಳಿಗಳಲ್ಲಿ ಲೀನವಾದೆ…!!

ಪ್ರೀತಿಯ ಲೆಕ್ಕಾಚಾರ

ಅಧರ ಅಧರಗಳ
ಮಧುರ ಸಂಕಲನ….
ಸಮಕ್ಷಮ ಸಮಾಗಮ
ವ್ಯಥೆಯ ವ್ಯವಕಲನ…
ಮುತ್ತು ಗುಣಿಲೆ ಹತ್ತು
ನಿಲ್ಲದ ಗುಣಾಕಾರ…
ಮತ್ತು ಬಾಗಿಲೆ ಹೊತ್ತು
ಗೆಲ್ಲದ ಭಾಗಾಕಾರ…
ನಿನ್ನಲ್ಲಿ ನನ್ನ
ಕೂಡಿ-ಕಳೆದು
ಗುಣಿಸಿ-ಭಾಗಿಸಿದರೂ
ಉಳಿದದ್ದು
ಒಂದೇ ಉಸಿರು…
ಒಂದೇ ಕನಸು…
ಒಂದೇ ಪ್ರಾಣ…
ಪ್ರೀತಿಯ ಲೆಕ್ಕಾಚಾರ
ಬಲು ವಿಚಿತ್ರ….!!

ಉತ್ತರದ ಅಪೇಕ್ಷೆಯಿಲ್ಲದ ಪ್ರಶ್ನೆಗಳು….!!

ಮುದ್ದು ಜಿಂಕೆಮರಿ….

ಇವತ್ತು ನಿನ್ನಲ್ಲಿ ಕೆಲವು ಪ್ರಶ್ನೆಗಳನ್ನು ಕೇಳೋದಕ್ಕಿದೆ…. ಎಂದಿನಂತೆ, ಉತ್ತರಿಸಲೇ ಬೇಕು ಎನ್ನೋ Condition ಇವತ್ತೂ ಇಲ್ಲ…. ಹಾಗೇ ಸುಮ್ಮನೇ ಓದಿ ಮುಗುಳ್ನಕ್ಕರೆ ಸಾಕು… ಸೂರ್ಯನ ಬೆಳಕನ್ನು ಪ್ರತಿಪಲಿಸಿ ಚಂದ್ರ ಹೊಳೆವಂತೆ, ಆ ನಗುವ ನೋಡಿ ನಾನೂ ಸ್ವಲ್ಪ ನಗುತ್ತೇನೆ…. ನಿನ್ನ ಕಣ್ಣುಗಳಲ್ಲಿ ಹೊಳೆದು ಮಾಯವಾಗೋ ಉತ್ತರಗಳನ್ನ ಹಾಗೇ ನನ್ನ ಕಣ್ಣ ಕನ್ನಡಿಯಲ್ಲಿ ಖೈದು ಮಾಡಿಕೊಳ್ಳುತ್ತೇನೆ….

ಕಂಗಳ ಹೊಳಪು ಅಂದ ಕೂಡಲೇ ನೆನಪಾಯ್ತು ನೋಡು… ನಾನು ಕೇಳಬೇಕಿದ್ದ ಮೊದಲ ಪ್ರಶ್ನೆ ಅದೇ…. ಮುಂದೇನು ಎಂದು ತೋಚದೇ ನಾನು ಕತ್ತಲಲ್ಲಿ ಕೊಸರಾಡುತ್ತಿರುವಾಗಲೆಲ್ಲ ಬೆಳಕಾಗಿ ನನ್ನನ್ನ ಕತ್ತಲಿಂದ ಹೊರಗೆ ತರೋದು ಅದೇ ನಿನ್ನ ಕಂಗಳ ಹೊಳಪು… ಆ ಕಣ್ಣುಗಳಲ್ಲಿ ಕಣ್ಣನಿಟ್ಟು ನೋಡ್ತಾ ಇದ್ರೆ ಮನಸ್ಸು

ಕಣ್ಣಿನ ನೋಟಗಳು ಕೋಲ್ಮಿಂಚಿನ ಬಾಣಗಳು….
ಕಣ್ಣಿನ ಮಾತುಗಳು ಬಿಡಿಸ್‍ಹೇಳದ ಒಗಟುಗಳು
ಕಣ್ಣಿನ ಹಾಡುಗಳು ತಿರು ತಿರುಗಿಸೋ ರಾಟೆಗಳು
ಇಂತೋಳ ಕಣ್ಣಿನಲಿ ನಾನು ಸೇರಿಕೊಳ್ಳಲೆ
ಹಾಡಿಕೊಳ್ಳಲೆ……ಸ್ವರ್ಗ ಇಲ್ಲಿಯೆ ಕಂಡುಕೊಳ್ಳಲೆ

ಅಂತ ಹಾಡೋಕೆ ಶುರುವಿಟ್ಟುಕೊಳ್ಳುತ್ತದೆ…. ನೀನು ಆ ಹೊಳಪನ್ನು ಕದ್ದು ಕಣ್ಣಿಗೇರಿಸಿಕೊಂಡದ್ದಾದ್ರೂ ಯಾರಿಂದ…?? ಜಗವ ಬೆಳಗೋ ಜವಾಬ್ದಾರಿ ಹೊತ್ತು, ತನ್ನೊಡಲಲ್ಲಿ ಉರಿಯೋ ಬೆಂಕಿಯನ್ನಿಟ್ಟುಕೊಂಡು ಜಗತ್ತಿಗೇ ಬೆಳಕು ಕೊಡೋ ಸೂರ್ಯನಿಂದಲಾ…?? ತಾಯಿ ಮಗುವಿಗೆ ಊಟ ಮಾಡಿಸಲು ಹೆಳೆಯಾಗೋ, ಪ್ರೇಮಿಗಳಿಗೆ ಪ್ರಿಯತಮೆಯ ಹೋಲಿಕೆಗೆ ಕೈ ಸಿಗೋ, ಕವಿಗಳ ಕವಿತೆಗೆ ಸ್ಪೂರ್ತಿಯಾಗೋ ಚಂದ್ರನಿಂದಲಾ…?? ಅಥವಾ ದಿನ ರಾತ್ರಿ ಆಗಸಕ್ಕೆ ದೀಪದ ಅಲಂಕಾರ ಮಾಡೋ ಕೋಟಿ ತಾರೆಗಳಿಂದಲಾ…?? ದೇವರ ಗುಡಿಯಲ್ಲಿ ಆಗತಾನೆ ಬೆಳಗಿಸಿಟ್ಟ ದೀಪದಿಂದಲಾ..?? ಇಲ್ಲಾ ದೀಪಾವಳಿಯಂದು ಮನೆ ಮನೆಯಲ್ಲಿ ಸಿಂಗರಿಸಿಕೊಂಡು ಬೆಳಗೋ ಆಕಾಶಬುಟ್ಟಿಯಿಂದಲಾ…?? ಆಗಸದಿಂದ ಧರೆಗೆ ಚಿಮ್ಮಿ, ನೀನು ಕಿಟಾರ್ ಅಂತ ಕಿರುಚಿ ನನ್ನೆದೆಗೆ ಒರಗುವಂತೆ ಮಾಡೋ ಮುಂಗಾರಿನ ಮಿಂಚಿನಿಂದಲಾ…?? ಇಲ್ಲಾ ಗಣೇಶೋತ್ಸವದ ವಿದ್ಯುದಲಂಕಾರದಂತೆ ಮಿನುಗಿ ಪ್ರತಿ ಇರುಳಿಗೂ ಹೊಸ ಮೆರುಗು ನೀಡೋ ಜೀವ ಜಗದ ವಿಸ್ಮಯ ಮಿಂಚು ಹುಳದಿಂದಲಾ…?? ಚೆಂದುಳ್ಳಿ ಚೆಲುವೆಯರ Ramp Walk ಗೆ ಸಾಥ್ ನೀಡೋ Shoping Mall ಗಳ ರಂಗು ರಂಗಿನ ದಿಪಗಳಿಂದಲಾ…..?? ಅಥವಾ ಸಿರಸಿ ಜಾತ್ರೆಯ ಜಂಬೋ ಸರ್ಕಸ್ ನವರು ಆಕಾಶಕ್ಕೊಂದು ಏಣಿ ಬರೆದಂತೆ ತೇಲಿ ಬಿಟ್ಟ ಸರ್ಚ್ ಲೈಟ್ ನಿಂದಲಾ…??

ಅದು ಏನು ಅಂತ ನಿನ್ನ ದನಿಯಲ್ಲೇ ಕೇಳುವಾಸೆ… ಹೌದು… ನಿನ್ನ ದ್ವನಿ ಕೇಳಿದಾಗಲೆಲ್ಲ ಹೃದಯ

ನಿನ್ನ ನುಡಿಯು ಹೊನ್ನ ನುಡಿಯು
ಜೇನ ಹನಿಯು ಅಧರಕೆ…
ನನ್ನ ಎದೆಯ ವೀಣೆ ತಂತಿಯ ಮೀಟಿ ಓಡಿದೇ ಏತಕೆ…??

ಅಂತ ಹಾಡತೊಡಗುತ್ತದೆ…

ನಿನ್ನ ಗಂಟಲಲ್ಲಿ ಇಷ್ಟು ಮಧುರ ದ್ವನಿಯಾದ್ರೂ ಯಾತರಿಂದ ಸೇರಿಕೊಂಡಿತು..?? ಮಾವಿನ ಮರದಲ್ಲಿ ಅಡಗಿ ಕುಳಿತು ವಸಂತನಿಗೆ ಸ್ವಾಗತ ಹಾಡೋ ಕೊಗಿಲೆಯಿಂದಲಾ…?? ಅಥವಾ ಮಂದಿರದಲ್ಲಿ ಮೊಳಗುವ ಮಂತ್ರಘೋಶದಿಂದಲಾ…?? ಅಮ್ಮನ ಮಡಿಲಲ್ಲಿ ಕೇಕೆ ಹಾಕೋ ಕಂದಮ್ಮನಿಂದಲಾ….?? ಅಥವಾ ದ್ವಾಪರದ ಕೃಷ್ಣ ನುಡಿಸಿದ ಕೊಳಲಿನಿಂದಲಾ…?? ವಿಧ್ಯಾದಿದೇವತೆ ಸರಸ್ವತಿಯ ಕೈಲಿರೋ ವೀಣೆಯಿಂದಲಾ…?? ಅಥವಾ ಬಿಸ್ಮಿಲ್ಲಾ ಖಾನರ ಶೆಹನಾಯಿಯಿಂದಲಾ..?? ನಿನ್ನಷ್ಟಕ್ಕೆ ನೀನು ಹಾಡಿಕೊಳ್ಳೋದು, ಮುಂಗಾರಿನ ಮಳೆಯಂತೆ ೨೪/೭ non stop ಮಾತನಾಡೋದು, ಕಲ್ಲನ್ನೂ ಕರಗಿಸೋ ಹಾಗೆ ನಗೋದು, ದೂರದಲ್ಲಿದ್ರೆ ಕೋತೀ ssssssss ಅಂತ ನನ್ನ ಕೂಗೋದು… ಹತ್ತಿರದಲ್ಲಿದ್ರೆ ನನ್ನ ಕಿವಿಯಲ್ಲೇ ಪಿಸುಗುಟ್ಟೋದು…. wooooooow…. ಸಪ್ತ ಸ್ವರ ಮಾದುರ್ಯವನ್ನ, ಸಂಗೀತದ ರಾಗ ತಾಳ ಲಯವನ್ನ ಆ ಬ್ರಹ್ಮ ನಿನ್ನ ಕೊರಳಲ್ಲಿ ತುಂಬಿಯೇ ಭೂಮಿಗೆ ಕಳಿಸಿದ್ದಾನೆ ಅಂತ ಅನಿಸೋದು ಅತಿಶಯವಲ್ಲ…

ಮೊದಲೇ ಹೇಳಿದಂತೆ ಈ ಪ್ರಶ್ನೆಗಳಿಗೆ ಉತ್ತರಿಸಲೇ ಬೇಕು ಅಂತೇನು ಇಲ್ಲ… ಸುಮ್ಮನೆ ಓದಿ ನಕ್ಕರೆ ಸಾಕು… ಸ್ವರ್ಗ ಇಲ್ಲಿಯೇ ಕಂಡುಕೊಳ್ಳುತ್ತೇನೆ….

ನಿನ್ನ ಮುದ್ದಿನ ಕೋತಿ….

ಪ್ರೀತ್ಸೋಣ ಬಾ…!!

ಪ್ರೀತಿ ಕೆಡಿಸುತ್ತೆ ಮತಿ…
ಮರೆಸುತ್ತೆ ನಮ್ಮ ಇತಿ-ಮಿತಿ…
ಜಗವೆ ಹುಚ್ಚರ ಸಂತೆ…
ಬಾ ತಲೆ ಕೆಡಿಸಿಕೊಳ್ಳೋಣ ನಾವೂ…!!

ಪ್ರೀತಿ ನೋವ ಒಡತಿ…
ನಲಿವು ಅದರ ಸವತಿ…
ಯಾರಿಗಿಲ್ಲ ನೋವು…??
ಬಾ ಈ ನೋವ ಸವಿಯೋಣ ನಾವು…!!

ಪ್ರೀತಿ ವಿಷದ ರೀತಿ…
ಹೇಳೋದು ಜಗದ ನೀತಿ…
ಯಾರಿಗಿಲ್ಲ ಸಾವು…??
ಬಾ ಈ ವಿಷವ ಕುಡಿಯೋಣ ನಾವು…!!

ಸೂರ್ಯನತ್ತ ಅಗ್ನಿಶಾಮಕ

ಎದೆಯಲಿ ಉರಿಯೋ ನೋವಿನ ಜ್ವಾಲೆ..
ನೀ ತೊರೆದ ಗಾಯವದು ಘಾತಕ…..,
ಕುಡಿಯೊಡೆದ ಪ್ರೀತಿಗೆ ಕೊಳ್ಳಿಯನಿಟ್ಟೆ..
ಮನದ ಮನೆಯಲಿ ನಿತ್ಯವೂ ಸೂತಕ….!!

ಗೆಳೆಯರು ಹೇಳುತ್ತಾರೆ….,
“ನಶೆಯೇ ನೋವನು ಮರೆಸೋ ಮದ್ದು..
ಗಡoಗಿನಲಿ ಗುಟುಕರಿಸು ಪಾನಕ…!!”
ಅವರಿಗೇನು ಗೊತ್ತು ಪಾಪ…??
ಆರದು ಅದರಿಂದ ಎದೆಯ ಜ್ವಾಲೆ…
ಅದೇನಿದ್ದರೂ, ಸೂರ್ಯನತ್ತ ನುಗ್ಗಿಬಂದಂತೆ
ಇಳೆಯ ಅಗ್ನಿಶಾಮಕ……!!

ನಶೆ

ನಶೆಯದೆಷ್ಟು ಚೆಲುವೆ…
ನಿನ್ನ ಕಣ್ಣುಗಳ ರಂಗಿನಲಿ…??
ನೋಡಿ ನಾನಾದೆ ದಂಗು…
ನಿಜ, ಕೇವಲ ಕಣ್ಣುಗಳಲ್ಲ ಅವು…
ನಶೆಯನೀಯೊ ಗಡoಗು…!!