ಹೆಸರಿಡದ ಹನಿಗಳು….!!

ಹಾಗೇ ಹೊಳೆದ ಕೆಲವು ಸಾಲುಗಳು… ಇವುಗಳಿಗೆ ಹೆಸರಿಡುವ ಸಾಹಸ ಮಾಡದೇ ಹಾಗೇ ಪೋಸ್ಟ್ ಮಾಡಿದ್ದೇನೆ… ಓದಿ ಏನನ್ನಿಸಿತು…?? ದಯವಿಟ್ಟು ಹೇಳಿ…

1.

ಅದೇನು ಆತುರ ನಿನಗೆ..??
ನಾನು ಕಣ್ಣು ಮಿಟುಕಿಸುವ ಮೊದಲೇ…
ನನ್ನ ಗಲ್ಲವ ಕಚ್ಛಾಯ್ತು…!!
ಅದೆಷ್ಟು ಗಾಢ ವರ್ಣ
ನಿನ್ನ ಲಿಪ್ ಸ್ಟಿಕ್ನದು..??
ನನಗರಿವಿಲ್ಲದೆಯೇ
ನಾಳಿನ ನ್ಯೂಸ್ ಪೇಪರ್
ಅಚ್ಛಾಯ್ತು…..!!

****************************
2.

ಮಂದಿರದ ಕೇಸರಿ ಪತಾಕೆ….
ಮಸೀದಿಯ ಹಸಿರು ಗೋಡೆ….
ಚರ್ಚಿನ ಬಿಳಿಯ ಬಾಗಿಲು….
ಸೂರ್ಯನುದಯಕ್ಕೆ ಕಾತರಿಸಿವೆ…
ಸೂರ್ಯನ ಬೆಳಕಲ್ಲಿ ಅವುಗಳ
ನೆರಳಿಗೆ ಒಂದೇ ಬಣ್ಣ…..!!

****************************
3.

ನವ ವಧುವಂತೆ
ಸಿಂಗರಿಸಿಕೊಂಡು
ಭೂ ತಾಯಿ
ಮೆರವಣಿಗೆ ಹೊರಟಿದ್ದಾಳೆ…
ಚೆಲುವಿಗೆ
ಮನಸೋತ ತಾರೆಗಳು
ಮೋಡದ ಮರೆಯಲ್ಲಿ ನಿಂತು
ಫೋಟೋ ಕ್ಲಿಕ್ಕಿಸುತ್ತಿವೆ…!!